深度文 –沐浴露可以當酒飲，世界已阻止不到戰鬥民族解酒癮了

俄國人酗酒問題嚴重雖然不是什麼新鮮事,但他們「渴酒」的程度確實是超乎我們想像的。很多俄羅斯人喜愛喝伏特加，可是對部分人來說，酒精飲品的價格並不便宜。買不起的話，其實有超過1200萬俄羅斯人也試過用酒精代替品來解酒癮，這些代替品包括有窗戶清潔劑、香水、鬚後水等。面對俄國人酗酒問題，當地政府多年來亦束手無策。

全俄民意研究中心(VTSIOM)於上年十二月尾公佈一項關於最低合法購買及飲用酒精年齡的調查，結果發現77%受訪俄國人認為應將合法買酒年齡由18歲提高到21歲， 只有17%受訪者反對此建議。

來自俄羅斯主要城鎮（人口超過100萬）的受訪者比居住在小市鎮的受訪者對此建議更表示歡迎。相反，來自俄羅斯兩大城市:莫斯科及聖彼得堡的受訪者則對提高最低合法購買酒精年齡的支持度不太。

即使民意表示支持，俄國政府卻對此建議有所保留。事實上，俄羅斯參議員Anton Belyakov早於 2009, 2012, 2013,和2015提議將最低合法購買酒精年齡調高到21歲，目的是希望年輕一代可以遠離酗酒問題。惟四次草案連首讀也沒有就遭俄國政府反對，立法恐怕遙遙無期。

的確，俄羅斯對製造和售賣酒精飲品的監管的確有很大進步空間。俄國人酗酒鬧事、廉價劣質酒在市面上泛濫等等，這些社會問題政府都好應該正視。但單靠提高合法買酒精年齡又是否有效呢?

俄羅斯飲用酒精市場存在兩大問題：一，俄國人會購買香水或沐浴劑充當飲用酒精飲用，因為這些商品能避過銷售限制及稅收，價格比飲用酒精便宜，因而變成飲用酒精的代替品。二，很多地下工場製造假酒，轉售到消費者手上。假酒或劣質酒的製造成份不明，飲用後可能會中毒甚至死亡。在2016年十二月,位於俄羅斯西伯利亞地區的重要城市伊爾庫茨克（Ирку́тск）就發生沐浴露代酒中毒事件。受害者飲用了沐浴露含有致命的有毒物質甲醇，造成至今74人死亡，事件亦引來國際關注。

俄羅斯總統普京就事件表示關注，亦宣佈對含酒精產品增加稅收的措施。除了從法例上作出監管外，俄國政府應從教育方面著手，盡量減低市民對非飲用酒精商品和劣質酒的飲用需求，才能杜絕問題根本。

原文刊在《獨立媒體》2017-01-05

➫FB: 香港人在俄羅斯
➫IG: https://goo.gl/fFHMfM

 

俄羅斯乜乜乜🤔(2) － 黑口黑面

俄羅斯人係咪唔笑

平時上網搵到啲文章話俄羅斯人成日唔笑，到底現實又係唔係？我個人認為香港人都成日黑面，所以睇唔出有咩文化大分別。西方人感覺就比較大。

有種笑容叫做duty smile，即係返工對住老細同客人係咪都要笑果種，西方國家或者日本會比較重視。例如：行入間餐廳侍應會同你問好呀，嘢食到咗又問啱唔啱你口味呀，得閒又會過嚟同你吹下水，了解下你。一般香港啲餐廳邊有呢啲嘢啫。

其實唔笑，又有乜好怕喎。

有笑容固然之係好，但重點係要發自內心。成日假笑就變得虛偽囉。俄羅斯人唔係唔笑，佢哋嘅笑容係sincere smile多啫。同俄羅斯人friend咗，咪一樣嘻嘻哈哈，成日互笑大家。如果無啦啦超級市場個收銀呀姐對住你笑，你仲驚啦。總之，我嚟到俄羅斯都無咩唔習慣。

P.S. 我都成日俾人話我黑面。

食嘢係咪要比TIPS

呢樣好睇個人意願同場合。俄羅斯都有快餐店或者飯堂（столовая），價錢當然平民化啲，亦無比tips嘅習慣。我諗無人去大家樂大快活都比tips掛。

另外都有貴少少，環境舒服少少嘅餐廳。我會視乎侍應嘅服務而決定比唔比tips。有時找錢咪比啲碎銀囉(10-30rubles)，兌返港紙其實都係幾蚊。

Fine Dining嘅話就，碌卡搞掂唔使煩。

深度文 – 俄羅斯人點睇俄羅斯

受歐美制裁，俄羅斯本地人點睇

因烏克蘭危機爆發，自二零一四年起俄羅斯受到歐盟跟美國連番制裁。經濟打壓持續兩年多，俄國國內生產總值明顯下跌，盧布大幅貶值，究竟俄羅斯本地人又點睇呢種國際關係呢？

俄羅斯獨立自主、非盈利社會調查中心喺十月做咗份調查，發現多數俄羅斯人認為西方國家對俄國嘅政治批評係為咗削弱俄國喺國際間嘅地位，亦覺得俄國政府不需理會。

調查結果顯示59%受訪者認為西方國家對俄國嘅批評並唔重要，只係得30％受訪者認為當局同社會應該更加重視呢啲批評。

呢份調查亦探討咗受訪者想法嘅背後原因。43％的人認為西方國家只係想削弱俄羅斯的國際競爭力，所以他們對任何關於俄國嘅報告都有存有偏見。35%受訪者就覺得，俄羅斯對西方嘅不友好態度係一種傳統，25％受訪者就提到，西方國家為咗逃避責任，轉移視線，總係怪罪於俄羅斯。

俄羅斯本地人嘅移民諗法

講到移民呢家嘢，中國人好有自己一套演繹方法。口裡說愛國，但個個趕去拎本外國護照；又話要撐國貨，但就衝去小日本國狂掃。咁俄國人又點睇俄羅斯前景呢？會唔會口裡說愛國，心裡想移民？

Газета.Ru喺十月公佈咗一項社會調查，顯示有75％嘅受訪俄國人希望佢哋嘅下一代繼續生活喺祖國俄羅斯，並唔鍾意佢哋移民到國外。調查結果顯示，經濟形勢不穩定同西方國家製裁並未影響到俄羅斯人嘅移民睇法。有86％的俄羅斯公民並唔願意離開俄羅斯。

俄羅斯除咗喺外交上有自己一套諗法外，以上嘅調查亦顯示咗俄羅斯公民面對西方國家時不妥協嘅心態，亦用行動證明咗佢哋嘅愛國心。呢種心行合一，實在好值得中國人民借鑒。

港燦留俄 – 基本嘢 (2)

之前基本嘢(1)就講咗關於出發前嘅準備，今期就講吓去到俄羅斯之後嘅實戰篇。基本嘢(2)會首先講點交電話費，之後再介紹下呢到嘅交通工具。

交電話費有三個方法：

1.上網繳費    

2.到電話供應商嘅門市俾錢    

3.去街度搵增值機增值

上網繳費嘅話，雖然電話供應商啲網頁支援英文版，但係開發得唔係咁好，唔係個個位都有英文翻譯，又要自己慢慢打信用卡啲資料，對我嚟講kind of麻煩囉。（JM tone）

到門市比錢係幾好，又唔會收你手續費，但係要特登行過去俾錢好唔convenient囉。無晒自己個life，come on。

增值機就正啦，成街都係。地鐵站、火車站同超級市場裡面都有，只要有cash係身就可以增值。增值機有個touch screen，只要㩒一㩒你嘅供應商logo同輸入返你個電話號碼，然後俾錢就搞掂。雖然部機會charrrrrrge你少少手續費，都係港紙幾蚊啫。增值機咁方便，佢deserrrrrrve嘅。

而家好多電話供應商例如Beeline，YOTA，MTC等都有電話app 可以download。有咗個app就可以隨時查詢通話費有幾多、用淨幾多data，同提你幾多號要交電話費。

聖彼得堡有四種主要交通工具：地鐵(метро)、巴士(автобус)、無軌電車(троллейбус)、小巴(маршрутка)。

地鐵(метро)：

地鐵有5條線，67個站。路線圖有英文同俄文，所以每個地方名點讀應該難唔到大家啦。
收費方面每程要35RUB，無論遠近都劃一收費。入到地鐵可以用機或者去counter買。俾錢之後你會收到個Token，係入閘時用嘅。

另外呢度亦有類似八達通嘅咭買，佢叫做smart card。只要增值後就可以用嚟搭地鐵，巴士同無軌電車都得。

當然亦有7日，15日，30日等嘅地鐵飛買，視乎你嚟呢度玩幾多日啦。收費可以㩒入呢度參考。

俄羅斯地鐵起得好深，由地面搭電梯落月台要兩分鐘（無聊之下我自己計時）。所以..有時落到地鐵站會收唔到電話㗎。

小巴(маршрутка)：

由於小巴係私人經營，所以只收現金。費用30至36RUB。同香港啲小巴一樣，要嗌『有落』先停站。所以要清楚條小巴線先好上車。安全起見，嚟旅遊嘅就唔建議搭小巴啦。

巴士(автобус)

費用30RUB，用現金或smart card俾錢都可以。巴士裡面有個工作人員負責收錢。俾錢後佢會俾張飛仔你做收據。最早5.30-5.45 AM頭班車， 最晏 0.00-0.30 AM尾班車。咁凌晨點算好？weekend呢度有Night buses (1М, 2M, 3M, 4M and 5M)嘅。班次相對會疏啲，所以想慳錢搭巴士嘅就唔好玩咁夜啦。

無軌電車(троллейбус)

最後有無軌電車，運作上同搭巴士差唔多。最緊要係上車前睇清楚佢係巴士定無軌電車，因為有時會撞咗number。上錯咗就大獲。

港燦留俄 － 夜蒲聖彼得堡

嚟到俄羅斯，無理由唔感受下當地人嘅夜生活。不過玩還玩，要注意安全嘅。俄羅斯啲夜場同酒吧唔係間間都咁decent架，原因第一：有啲酒吧會賣假酒，第二：要睇埋客人質素。今次我為大家介紹呢間酒吧出名嘅係佢獨特嘅室內設計同音樂！潛到天光都唔想返屋企。

VNVNC

鍾意聽 EDM的人有福了！

雖然香港依家無咩夜場會播Industrial Trance或者IDM音樂，但我相信仲有呢類型音樂嘅粉絲嘅。VNVNC呢間吧裝修成一間聖堂咁，一入門口已經見到幅彩繪落地玻璃， 極高樓底，天花就吊住大大個刺冠。淨係睇裝修都已經有夢幻gothic嘅感覺。

門口直行右手邊就有吧檯，係呢度嗌嘢飲大概要200-350盧布，價錢合理，可惜選擇唔多。紅白酒基本上冇得揀，cocktails 都有classic同七款自家recipes，肚餓嘅話仲可以叫個熱狗頂下肚先。VNVNC中間有個細嘅dance floor，大概凌晨一點就開始多人。一路聽住downtempo, trip-hop, deep house, minimal techno 音樂，一路進入第二個境界…

不過提提大家，VNVNC淨係開星期五，六晚，編排行程嘅時候要注意啦！

👻VNVNC網頁：https://vk.com/vnvnc

👽VNVNC位置：

俄羅斯乜乜乜🤔 (1)－ 治安差？

出發去俄羅斯之前我做咗好多關於俄羅斯嘅research，了解下旅遊景點同當地文化咁。除咗因為係我第一次踏足呢片土地，同埋對俄羅斯充滿好奇外，我亦係唔同渠道接收到【俄羅斯好危險好恐怖】呢個概念。所以某程度上我係抱住「唔想死」嘅態度去做咗好多資料搜集。究竟而家現居聖彼得堡嘅我對於當初幻想出嚟同真實嘅俄羅斯出入有幾多呢？網上嘅輿論又有幾多成係堅？就等我去分析下。

• 俄羅斯人好鍾意飲酒🍷？

冇錯，街上係有幾多Liquor Store同酒吧，不過其實澳洲，歐洲都有啦。

咁講到醉酒佬多唔多，我認為唔夠澳洲多。以前我係澳洲住，夜晚係CBD都遇到唔少醉酒佬周街大叫，破壞公物。相反俄羅斯又真係冇咁多。當然係我嘅個人意見同觀察，不過大家不妨參考吓啦。

• 俄羅斯好多小偷💸？

平時我會咩背囊，拎手袋或斜孭袋出街，不過有啲情況我出街會特別小心，例如去唱錢，去拎錢，或者去交啲重要文件，呢個時候我會出動腰包！我知，好老土呀嘛。如果你哋嚟俄羅斯旅遊又驚俾人偷嘢，其實都可以係香港買定個腰包。我個腰包係戶外體育用品舖頭買， 例如Overlander，Protrek 呢啲，我揀個款係超級貼身嘅，基本上個腰包比上身衫襟住，係完全唔覺眼，老土byebye。

至於個人經驗嚟睇，我或者我身邊嘅人都未遇過被人偷嘢，比我想像中好，可以話係好彩？計我話，就算你係嚟旅遊，都唔應該擺晒個遊客款出嚟，周街google map，睇地圖又問路。出發去每個景點前都計劃好，有個概念點去，搭咩車等等，咁可以減低機成為小偷目標嘅機會。

都係個句：度度都有小偷架啦，香港都有唔少。出得嚟行，小心保管好財物係基本。

• 俄羅斯好貪污腐敗👥？

呢個問題有啲難答，好多嘢都係相對嘅。咁你話而家嘅香港政府腐唔腐敗呀？哈哈。

我可以話，係俄羅斯用錢可以解決到好多問題，例如係行政上，如果你想你啲文件處理得快啲，您可以比少少著數人，佢開心時你又開心（嗱，我冇鼓勵你咁做）。

之前同個俄羅斯朋友講開俄羅斯男仔係18到27歲之間要去服兵役嘅事。當兵唔係個個都想，不過除非你有醫生紙證明你唔適合當兵，否則都要去磨練下自己一年。兵役訓練你啲咩？唔知架，有人會批薯仔批咗成年，有人訓練咗幾星期就被送上戰場。不過有錢洗得鬼推磨，比啲錢買張醫生紙返嚟，咪可以免疫囉。

• 俄羅斯治安差，夜晚唔好出街🌃？

我又唔覺得呀。夜晚嘅俄羅斯好迷人，日落之後散步感覺好浪漫。

俄羅斯嘅大城市，夜晚都好熱鬧。好多舖頭都收好晏，24小時營業嘅超級市場好易搵，係聖彼得堡幾出名嘅商場Galeria都收夜晚十一點。平日夜晚十一二點係街都唔會覺得冷清，weekend到凌晨4，5點都仲有人係街度散步（唔係醉酒佬）。我自己星期五，六，日晚一般都會出街，有時出到第二朝先返屋企。一直都無咩奇怪事情發生。

P.S.其實每個城市都有佢dodgy嘅地方，如果你嚟到聖彼得堡，我建議你唔好夜晚到Dumskaya，呢條酒吧夜店街罪案率較高，所以盡量避免啦。

今次講到呢度，如果大家對於俄羅斯旅遊或生活方面有疑問都可以同我聯絡㗎🦄

港燦留俄 – 基本嘢(1)

身邊好多朋友都覺得俄羅斯人係戰鬥民族，伏特加當水飲，駕駛技術超恐怖等等，但事實上對當地文化唔熟悉，甚至未嚟過體驗。做人點可以咁武斷:P 搬咗嚟聖彼得堡一排，我對呢度嘅生活細節都略知一二，如果想嚟俄羅斯旅遊，工作，甚至生活呢，都可以參考以下資料：

1：簽證

如果你持有香港特區護照，就可以免簽證逗留俄羅斯14日。 有澳門特區護照仲好，有30日免簽證旅遊。假如你抽起條筋，想喺俄羅斯長住，做嘢或讀書，就一定要有張邀請函 （Invitation letter）先可以申請VISA。呢樣嘢當然係僱主或學校幫你搞啦。搞幾耐？唔知，當地人辦事無一套準則嘅，所以老虎蟹都唔好買機票住。當你收到張邀請函，就可以上網搞VISA APPLICATION。個ONLINE VISA APPLICATION需要用到邀請函上嘅資料，可惜，張邀請函係用俄文寫嘅，記得花多少少時間去理解下，免得申請時資料有誤。網上寫申請後五個工作天先攞到VISA，但其實都係錢作怪。急起上嚟比多啲錢，一個工作天就搞掂。邀請函個樣 ->

整簽證需要咩文件:

• ONLINE簽證申請表
• 邀請函正本
• 護照
• 身分證影印本
• 證件相 (35mm  x 45mm)
  唔清楚嘅話就同攝影師講要BNO嗰隻
• HIV報告

2：兌換當地貨幣

喺香港有得唱盧布嘅。資料搜集過係銀行唱超唔抵，上環牛記會比較好，可以參考下佢匯率。我自己喺香港唱少少盧布，夠去到搭車用就OK，到埗後先再唱之後生活用嘅。街上有好多兌換店，可以用歐元或美金換盧布，但匯率成日變，甚至每小時都有變動，自己睇準時機兌換啦。

3：電話咭

對機不離手嘅我嚟講，電話咭真係好緊要。之前去日本，泰國，歐洲旅行前，我通常會去鴨記買好電話咭，一落機就即刻有得上網，好方便。但我自己就搵唔到香港邊度有得賣俄羅斯通用嘅電話咭啦。如果你係跟旅行團嚟俄羅斯，有啲旅行社可以預先幫你代買電話咭，價錢HKD300－400左右。值唔值得買呢？睇你自己啦。其實莫斯科同聖彼得堡個機場都有電話供應商嘅舖頭，買電話咭唔難，而且機場本身都有WIFI。價錢方面，舉個例，我自己用緊嘅電話咭係400蚊盧布一個月，即係港紙50蚊度，有無限上網，100分鐘通話費。電話供應商主要有幾間： MEGAFON，BEELINE， MTS，YOTA，TELE2等等，係街上好易搵到。↴

如果對出發前嘅準備有咩疑問，我好樂意同大家一齊研究研究㗎！