聖彼得堡MUST GO景點 -New Holland溜冰場

今年聖彼得堡十月尾就開始❄️落雪❄️。平均嚟講要等到第二年嘅三月先會開始融雪,進入初春。成個冬天流流長,咪以為冇地方好去呀,呢個New Holland 新開嘅戶外溜冰場係我嘅重點推介。一來香港冇戶外溜冰場,成件事變得好有新鮮感。二來價錢平又唔多人,😙好抵玩!

img_4144

New Holland係聖彼得堡市內嘅一個”島”。好耐之前係個船廠,今年八月重開,變咗一個專搞文化同社區活動嘅地方。由於好多Music Concert都係呢度舉辦,開幕冇耐已經吸引咗好多年青人去呢度玩。而New Holland個戶外溜冰場都係今年先新開張啦,所以佢租畀客人嘅溜冰鞋係超新淨。

我平日晏晝入去玩,入場費只不過係100Rubles ,港紙12蚊左右。連租鞋埋單洗咗320Rubles,即係港紙40蚊。咁當然夜晚時段同Weekend入場都會貴少少,但係喺負十幾度嘅氣溫下踩冰真係好過癮。

New Holland溜冰場定咗每一個鐘為一個時段,每個時段之間都有個Break,啲工作人員就會趁呢個時候產平返個場。呢度嘅工作人員除咗專業之外服務態度亦超好,會走過嚟同我傾下計,用佢哋僅餘嘅英文知識主動同我溝通,抵讚。

img_4169edit

個溜冰場好大,但係人唔多,可以盡情加速到唔驚撞到人⛸

New Holland 戶外溜冰場資料:

溜冰場開放日子:2016年11月19日至2017年3月15日

溜冰場收費表:https://goo.gl/G0SdMQ

網址:http://www.newhollandsp.ru/en/

地圖:

港燦留俄 - 夜蒲聖彼得堡 (2)

THE HAT BAR - 爵士樂手聚腳點

每次識新朋友嗰陣,都會循例問下人哋平時夜晚得閒會去邊玩。 幾乎每個人都會推薦我去呢間The Hat Bar。 點解咁值得去? 因為每晚都有Live Jazz Music聽囉😌。

爵士樂可能對平民百姓嚟講易入口啲,至少都聽過下Louis Armstrong或者Billie Holiday啲歌掛。The Hat Bar個老闆,好明顯係個爵士樂愛好者。為咗公諸同好,佢好歡迎爵士樂手嚟Jam下歌,重點係平日夜晚聽眾免費入場。周末去雖然要俾少少入場費,比錢換token入場,拎住個token又可以換返杯Free drink比你,Fair enough。

wineedited

間Bar唔大,周末去真係好迫,搵個位企下都難。我個人比較鍾意平日去,有位坐,舒服啲。間Bar嘅裝修加入咗好多美國舊式酒吧嘅元素,內牆牆身用咗鴨屎綠色,Corner位有真皮梳化,精緻嘅吧檯凳,仲有牆身嘅壁燈發出柔和嘅光線,全部都好配合到爵士樂個feel。Weekend就算再迫,人多搞到又焗又熱,live music一嚟嘅時候所有人都一樣享受(除咗我)。

img_2735

The Hat Bar 會不定期搞下啲新節目,係呀不定期呀,因為爵士樂最鍾意玩即興㗎啦,睇下你好唔好彩遇到啱你口味嘅爵士樂手啦。

 

應該幾點去The Hat Bar:平日十一點後,星期六日十點幾好去到,真係好多人㗎!

預幾多錢去The Hat Bar:嘢飲價錢好合理,每杯價錢大約150—450盧布

The Hat Bar地址