俄羅斯乜乜乜🤔(2) - 黑口黑面

俄羅斯人係咪唔笑

平時上網搵到啲文章話俄羅斯人成日唔笑,到底現實又係唔係?我個人認為香港人都成日黑面,所以睇唔出有咩文化大分別。西方人感覺就比較大。

有種笑容叫做duty smile,即係返工對住老細同客人係咪都要笑果種,西方國家或者日本會比較重視。例如:行入間餐廳侍應會同你問好呀,嘢食到咗又問啱唔啱你口味呀,得閒又會過嚟同你吹下水,了解下你。一般香港啲餐廳邊有呢啲嘢啫。

其實唔笑,又有乜好怕喎。

有笑容固然之係好,但重點係要發自內心。成日假笑就變得虛偽囉。俄羅斯人唔係唔笑,佢哋嘅笑容係sincere smile多啫。同俄羅斯人friend咗,咪一樣嘻嘻哈哈,成日互笑大家。如果無啦啦超級市場個收銀呀姐對住你笑,你仲驚啦。總之,我嚟到俄羅斯都無咩唔習慣。

P.S. 我都成日俾人話我黑面。

食嘢係咪要比TIPS

呢樣好睇個人意願同場合。俄羅斯都有快餐店或者飯堂(столовая),價錢當然平民化啲,亦無比tips嘅習慣。我諗無人去大家樂大快活都比tips掛。

另外都有貴少少,環境舒服少少嘅餐廳。我會視乎侍應嘅服務而決定比唔比tips。有時找錢咪比啲碎銀囉(10-30rubles),兌返港紙其實都係幾蚊。

Fine Dining嘅話就,碌卡搞掂唔使煩。

Advertisements

深度文 – 俄羅斯人點睇俄羅斯

受歐美制裁,俄羅斯本地人點睇

因烏克蘭危機爆發,自二零一四年起俄羅斯受到歐盟跟美國連番制裁。經濟打壓持續兩年多,俄國國內生產總值明顯下跌,盧布大幅貶值,究竟俄羅斯本地人又點睇呢種國際關係呢?

俄羅斯獨立自主、非盈利社會調查中心喺十月做咗份調查,發現多數俄羅斯人認為西方國家對俄國嘅政治批評係為咗削弱俄國喺國際間嘅地位,亦覺得俄國政府不需理會。

調查結果顯示59%受訪者認為西方國家對俄國嘅批評並唔重要,只係得30%受訪者認為當局同社會應該更加重視呢啲批評。

呢份調查亦探討咗受訪者想法嘅背後原因。43%的人認為西方國家只係想削弱俄羅斯的國際競爭力,所以他們對任何關於俄國嘅報告都有存有偏見。35%受訪者就覺得,俄羅斯對西方嘅不友好態度係一種傳統,25%受訪者就提到,西方國家為咗逃避責任,轉移視線,總係怪罪於俄羅斯。

俄羅斯本地人嘅移民諗法

講到移民呢家嘢,中國人好有自己一套演繹方法。口裡說愛國,但個個趕去拎本外國護照;又話要撐國貨,但就衝去小日本國狂掃。咁俄國人又點睇俄羅斯前景呢?會唔會口裡說愛國,心裡想移民?

Газета.Ru喺十月公佈咗一項社會調查,顯示有75%嘅受訪俄國人希望佢哋嘅下一代繼續生活喺祖國俄羅斯,並唔鍾意佢哋移民到國外。調查結果顯示,經濟形勢不穩定同西方國家製裁並未影響到俄羅斯人嘅移民睇法。有86%的俄羅斯公民並唔願意離開俄羅斯。

俄羅斯除咗喺外交上有自己一套諗法外,以上嘅調查亦顯示咗俄羅斯公民面對西方國家時不妥協嘅心態,亦用行動證明咗佢哋嘅愛國心。呢種心行合一,實在好值得中國人民借鑒。

港燦留俄 -聖彼得堡MUST GO景點 (2)

勝家大樓 (Singer House)

唔讀書嘅我,平時見到三聯中華商務都調頭走。嚟到俄羅斯就比呢間充滿哈利波特feel嘅書店吸引住,決定入去自high扮文青。勝家大樓位於Nevsky Prospect同Canal Griboyedov之間。建築物嘅低層依家係間書店,而上層就係VK (social media巨頭)嘅辦公總部喇。

singerhouse-01

勝家大樓起初係三層高嘅住宅,後來比勝家衣車間公司買咗,想喺聖彼得堡起番個摩天大廈。可惜呢度有條建築規例講明所有大廈唔可以高過23.5 米。所以呀建築師Pavel Syuzor運用咗少少技巧令依家有六層高嘅勝家大樓望落宏偉啲,例如運用咗落地玻璃設計同加裝2.8米高嘅精緻門口。對於當時嚟講,呢種設計好摩登架啦。

喺1938年,呢棟建築物正式變成書店,雖然當中經歷過戰爭受損,不過之後都修復好啦。

img_3212

行入書店第一印象就係:嘩,洗唔洗咁靚。書店嘅第一層有好多紀念品買,價錢都算合理。最最最吸引我嘅係呢度嘅名信片,sneak peak比大家睇,我手上拎住嘅都好靚呀!

output_7a4qrt

singhouse2-01書店二樓有間Cafe Singer,行到攰可以入去嘆番杯咖啡,欣賞風景。

subheading-01

書店營業時間: 9am – 12am

預用幾耐行: 半個鐘,用嚟揀手信同明信片 (啲俄文書你都睇唔明㗎啦)

港燦留俄 – 基本嘢 (2)

之前基本嘢(1)就講咗關於出發前嘅準備,今期就講吓去到俄羅斯之後嘅實戰篇。基本嘢(2)會首先講點交電話費,之後再介紹下呢到嘅交通工具。

output_ywpsuf

交電話費有三個方法:

1.上網繳費    

2.到電話供應商嘅門市俾錢    

3.去街度搵增值機增值

上網繳費嘅話,雖然電話供應商啲網頁支援英文版,但係開發得唔係咁好,唔係個個位都有英文翻譯,又要自己慢慢打信用卡啲資料,對我嚟講kind of麻煩囉。(JM tone)

到門市比錢係幾好,又唔會收你手續費,但係要特登行過去俾錢好唔convenient囉。無晒自己個life,come on。

增值機就正啦,成街都係。地鐵站、火車站同超級市場裡面都有,只要有cash係身就可以增值。增值機有個touch screen,只要㩒一㩒你嘅供應商logo同輸入返你個電話號碼,然後俾錢就搞掂。雖然部機會charrrrrrge你少少手續費,都係港紙幾蚊啫。增值機咁方便,佢deserrrrrrve嘅。

而家好多電話供應商例如Beeline,YOTA,MTC等都有電話app 可以download。有咗個app就可以隨時查詢通話費有幾多、用淨幾多data,同提你幾多號要交電話費。

output_zchejn

聖彼得堡有四種主要交通工具:地鐵(метро)、巴士(автобус)、無軌電車(троллейбус)、小巴(маршрутка)。

地鐵(метро):

地鐵有5條線,67個站。路線圖有英文同俄文,所以每個地方名點讀應該難唔到大家啦。
收費方面每程要35RUB,無論遠近都劃一收費。入到地鐵可以用機或者去counter買。俾錢之後你會收到個Token,係入閘時用嘅。

另外呢度亦有類似八達通嘅咭買,佢叫做smart card。只要增值後就可以用嚟搭地鐵,巴士同無軌電車都得。

當然亦有7日,15日,30日等嘅地鐵飛買,視乎你嚟呢度玩幾多日啦。收費可以㩒入呢度參考。

俄羅斯地鐵起得好深,由地面搭電梯落月台要兩分鐘(無聊之下我自己計時)。所以..有時落到地鐵站會收唔到電話㗎。

trainstation

小巴(маршрутка):

由於小巴係私人經營,所以只收現金。費用30至36RUB。同香港啲小巴一樣,要嗌『有落』先停站。所以要清楚條小巴線先好上車。安全起見,嚟旅遊嘅就唔建議搭小巴啦。

巴士(автобус)

bus

費用30RUB,用現金或smart card俾錢都可以。巴士裡面有個工作人員負責收錢。俾錢後佢會俾張飛仔你做收據。最早5.30-5.45 AM頭班車, 最晏 0.00-0.30 AM尾班車。咁凌晨點算好?weekend呢度有Night buses (1М, 2M, 3M, 4M and 5M)嘅。班次相對會疏啲,所以想慳錢搭巴士嘅就唔好玩咁夜啦。

無軌電車(троллейбус)

最後有無軌電車,運作上同搭巴士差唔多。最緊要係上車前睇清楚佢係巴士定無軌電車,因為有時會撞咗number。上錯咗就大獲。