港燦留俄 - 夜蒲聖彼得堡

img_3474-copy

嚟到俄羅斯,無理由唔感受下當地人嘅夜生活。不過玩還玩,要注意安全嘅。俄羅斯啲夜場同酒吧唔係間間都咁decent架,原因第一:有啲酒吧會賣假酒,第二:要睇埋客人質素。今次我為大家介紹呢間酒吧出名嘅係佢獨特嘅室內設計同音樂!潛到天光都唔想返屋企。

VNVNC

img_3466

鍾意聽 EDM的人有福了!

雖然香港依家無咩夜場會播Industrial Trance或者IDM音樂,但我相信仲有呢類型音樂嘅粉絲嘅。VNVNC呢間吧裝修成一間聖堂咁,一入門口已經見到幅彩繪落地玻璃, 極高樓底,天花就吊住大大個刺冠。淨係睇裝修都已經有夢幻gothic嘅感覺。

img_3468

門口直行右手邊就有吧檯,係呢度嗌嘢飲大概要200-350盧布,價錢合理,可惜選擇唔多。紅白酒基本上冇得揀,cocktails 都有classic同七款自家recipes,肚餓嘅話仲可以叫個熱狗頂下肚先。VNVNC中間有個細嘅dance floor,大概凌晨一點就開始多人。一路聽住downtempo, trip-hop, deep house, minimal techno 音樂,一路進入第二個境界…

不過提提大家,VNVNC淨係開星期五,六晚,編排行程嘅時候要注意啦!

👻VNVNC網頁:https://vk.com/vnvnc

👽VNVNC位置:

俄羅斯乜乜乜🤔 (1)- 治安差?

出發去俄羅斯之前我做咗好多關於俄羅斯嘅research,了解下旅遊景點同當地文化咁。除咗因為係我第一次踏足呢片土地,同埋對俄羅斯充滿好奇外,我亦係唔同渠道接收到【俄羅斯好危險好恐怖】呢個概念。所以某程度上我係抱住「唔想死」嘅態度去做咗好多資料搜集。究竟而家現居聖彼得堡嘅我對於當初幻想出嚟同真實嘅俄羅斯出入有幾多呢?網上嘅輿論又有幾多成係堅?就等我去分析下。

  • 俄羅斯人好鍾意飲酒🍷?

冇錯,街上係有幾多Liquor Store同酒吧,不過其實澳洲,歐洲都有啦。

咁講到醉酒佬多唔多,我認為唔夠澳洲多。以前我係澳洲住,夜晚係CBD都遇到唔少醉酒佬周街大叫,破壞公物。相反俄羅斯又真係冇咁多。當然係我嘅個人意見同觀察,不過大家不妨參考吓啦。

output_y8r2lb

  • 俄羅斯好多小偷💸?

平時我會咩背囊,拎手袋或斜孭袋出街,不過有啲情況我出街會特別小心,例如去唱錢,去拎錢,或者去交啲重要文件,呢個時候我會出動腰包!我知,好老土呀嘛。如果你哋嚟俄羅斯旅遊又驚俾人偷嘢,其實都可以係香港買定個腰包。我個腰包係戶外體育用品舖頭買, 例如OverlanderProtrek 呢啲,我揀個款係超級貼身嘅,基本上個腰包比上身衫襟住,係完全唔覺眼,老土byebye。

至於個人經驗嚟睇,我或者我身邊嘅人都未遇過被人偷嘢,比我想像中好,可以話係好彩?計我話,就算你係嚟旅遊,都唔應該擺晒個遊客款出嚟,周街google map,睇地圖又問路。出發去每個景點前都計劃好,有個概念點去,搭咩車等等,咁可以減低機成為小偷目標嘅機會。

都係個句:度度都有小偷架啦,香港都有唔少。出得嚟行,小心保管好財物係基本。

  • 俄羅斯好貪污腐敗👥?

呢個問題有啲難答,好多嘢都係相對嘅。咁你話而家嘅香港政府腐唔腐敗呀?哈哈。

我可以話,係俄羅斯用錢可以解決到好多問題,例如係行政上,如果你想你啲文件處理得快啲,您可以比少少著數人,佢開心時你又開心(嗱,我冇鼓勵你咁做)。

之前同個俄羅斯朋友講開俄羅斯男仔係18到27歲之間要去服兵役嘅事。當兵唔係個個都想,不過除非你有醫生紙證明你唔適合當兵,否則都要去磨練下自己一年。兵役訓練你啲咩?唔知架,有人會批薯仔批咗成年,有人訓練咗幾星期就被送上戰場。不過有錢洗得鬼推磨,比啲錢買張醫生紙返嚟,咪可以免疫囉。

  • 俄羅斯治安差,夜晚唔好出街🌃?

fullsizerender

我又唔覺得呀。夜晚嘅俄羅斯好迷人,日落之後散步感覺好浪漫。

俄羅斯嘅大城市,夜晚都好熱鬧。好多舖頭都收好晏,24小時營業嘅超級市場好易搵,係聖彼得堡幾出名嘅商場Galeria都收夜晚十一點。平日夜晚十一二點係街都唔會覺得冷清,weekend到凌晨4,5點都仲有人係街度散步(唔係醉酒佬)。我自己星期五,六,日晚一般都會出街,有時出到第二朝先返屋企。一直都無咩奇怪事情發生。

P.S.其實每個城市都有佢dodgy嘅地方,如果你嚟到聖彼得堡,我建議你唔好夜晚到Dumskaya,呢條酒吧夜店街罪案率較高,所以盡量避免啦。

今次講到呢度,如果大家對於俄羅斯旅遊或生活方面有疑問都可以同我聯絡㗎🦄

港燦留俄 -聖彼得堡MUST GO景點

hermitagename-01

世界四大博物館之一嘅隱士廬博物館座落喺聖彼得堡市區內,除咗好易去之外,佢嘅收藏量多達三百萬以上,絕對係去聖彼得堡嘅must go景點。我推薦大家可以從涅瓦大街(Nevsky Prospekt)行去博物館門口,先感受下當地氣氛,留意下周圍嘅景物,進入咗文青mode再入去參觀。

img_2445

講返少少歷史背景:自1764年起,俄國沙皇凱薩琳大帝用好多錢由歐洲買入名畫和雕塑放喺聖彼得堡冬宮,後來擴建再擴建,儲儲下就走變咗今時今日嘅隱士廬博物館(The State Hermitage Museum)。而呢棟建築物就由義大利建築設計師拉斯特雷利設計嘅,係18世紀中葉俄國巴洛克式建築嘅傑出典範。compliationhermitge-01

喺隱士廬博物館可以欣賞到好多大師作品,例如拉斐爾(Raffaello Sanzio da Urbino)同 達文西(Leonardo da Vinci)嘅宗教畫作,米開朗基羅 (Michelangelo)嘅Crouching Boy雕塑。

subheading-01

入場費:600 RUB,大約75港紙。每月第一個星期四例外,可免費入場

幾點去最好:越早越好,話名 must go 景點,當然有好多旅行團都去

預幾多時間行好:3個鐘 齋行唔睇展品,5個鐘 淨係花少少時間睇著名作品,30年 每件藝術品都欣賞過

有冇廁所:有,但係唔好去main entrance嗰個,超臭。行入少少有其他廁所,乾淨好多。

睇唔明點算:佢定時會有導賞團可以join,另外亦有Audio guide 可以借嘅

點去:地圖係下面

港燦留俄 – 基本嘢(1)

img_27093-01

身邊好多朋友都覺得俄羅斯人係戰鬥民族,伏特加當水飲,駕駛技術超恐怖等等,但事實上對當地文化唔熟悉,甚至未嚟過體驗。做人點可以咁武斷:P 搬咗嚟聖彼得堡一排,我對呢度嘅生活細節都略知一二,如果想嚟俄羅斯旅遊,工作,甚至生活呢,都可以參考以下資料:

1:簽證

如果你持有香港特區護照,就可以免簽證逗留俄羅斯14日。 有澳門特區護照仲好,有30日免簽證旅遊。假如你抽起條筋,想喺俄羅斯長住,做嘢或讀書,就一定要有張邀請函 (Invitation letter)先可以申請VISA。呢樣嘢當然係僱主或學校幫你搞啦。搞幾耐?唔知,當地人辦事無一套準則嘅,所以老虎蟹都唔好買機票住。當你收到張邀請函,就可以上網搞VISA APPLICATION。個ONLINE VISA APPLICATION需要用到邀請函上嘅資料,可惜,張邀請函係用俄文寫嘅,記得花多少少時間去理解下,免得申請時資料有誤。網上寫申請後五個工作天先攞到VISA,但其實都係錢作怪。急起上嚟比多啲錢,一個工作天就搞掂。邀請函個樣 ->

scan整簽證需要咩文件:

  • ONLINE簽證申請表
  • 邀請函正本
  • 護照
  • 身分證影印本
  • 證件相 (35mm  x 45mm)
    唔清楚嘅話就同攝影師講要BNO嗰隻
  • HIV報告

2:兌換當地貨幣

喺香港有得唱盧布嘅。資料搜集過係銀行唱超唔抵,上環牛記會比較好,可以參考下佢匯率。我自己喺香港唱少少盧布,夠去到搭車用就OK,到埗後先再唱之後生活用嘅。街上有好多兌換店,可以用歐元或美金換盧布,但匯率成日變,甚至每小時都有變動,自己睇準時機兌換啦。

3:電話咭

對機不離手嘅我嚟講,電話咭真係好緊要。之前去日本,泰國,歐洲旅行前,我通常會去鴨記買好電話咭,一落機就即刻有得上網,好方便。但我自己就搵唔到香港邊度有得賣俄羅斯通用嘅電話咭啦。如果你係跟旅行團嚟俄羅斯,有啲旅行社可以預先幫你代買電話咭,價錢HKD300-400左右。值唔值得買呢?睇你自己啦。其實莫斯科同聖彼得堡個機場都有電話供應商嘅舖頭,買電話咭唔難,而且機場本身都有WIFI。價錢方面,舉個例,我自己用緊嘅電話咭係400蚊盧布一個月,即係港紙50蚊度,有無限上網,100分鐘通話費。電話供應商主要有幾間: MEGAFON,BEELINE, MTS,YOTA,TELE2等等,係街上好易搵到。↴

untitled-1-01

如果對出發前嘅準備有咩疑問,我好樂意同大家一齊研究研究㗎!